کوئٹہ(نیوزڈیسک) امیرجماعت اسلامی بلوچستان مولانا ہدایت الرحمن بلوچ نے کہا کہ بلوچستان کوتھانوں،چیک پوسٹوں آپریشنوں کی نہیں،معیاری تعلیم،تعلیمی اداروں قلم کتاب کی ضرورت ہے۔نوجوان کسی بھی قوم کا قیمتی سرمایہ ہوتے ہیں
اور ان کی صحیح رہنمائی ہی ایک مضبوط اور باوقار معاشرے کی ضمانت ہے۔اسلامی جمعیت طلبا نے ہمیشہ تعلیمی اداروں میں مثبت سرگرمیوں، طلبا کے مسائل کے حل اور اسلامی واخلاقی اقدار کے فروغ کے لیے نمایاں کردارادا کیاہے۔
ان خیالات کا اظہار انہوں نے اسلامی جمعیت طلبا کوئٹہ کے زیر اہتمام افطار ڈنر بعنوان "طالبعلم کی تعلیمی و اخلاقی ضرورت۔اسلامی جمعیت طلبا" مقامی میرج ہال میں خطاب کرتے ہوئے کیا۔
تقریب سے ناظم اسلامی جمعیت طلبہ بلوچستان احسان اللہ ناصر،ناظم اسلامی کوئٹہ اخونزادہ عطاالرحمن،نصیب اللہ ودیگرنے خطاب خطاب کیا تقریب میں اسلامی جمعیت طلبا کے قائدین اور دیگر معزز شخصیات نے شرکت وخطاب کیا۔
تقریب سے خطاب کرتے ہوئے مقررین نے کہا کہ اسلامی جمعیت طلبا ملک کی سب سے بڑی اور منظم طلبہ تنظیم ہے جو طلبا کی تعلیمی، اخلاقی اور فکری تربیت کے لیے عملی کردار ادا کر رہی ہے۔
موجودہ دور میں طلبا کو صرف تعلیمی میدان میں ہی نہیں بلکہ اخلاقی اور نظریاتی طور پر بھی مضبوط بنانے کی ضرورت ہے تاکہ وہ مستقبل میں ایک باکردار اور ذمہ دار شہری کے طور پر معاشرے کی خدمت کر سکیں۔دیگرمقررین نے اس بات پر زور دیا کہ طلبا کو منفی سرگرمیوں سے دور رہ کر علم، کردار اور خدمت کے میدان میں آگے بڑھنا چاہیے۔
اسلامی جمعیت طلبا نوجوانوں کو ایک مثبت پلیٹ فارم فراہم کرتی ہے جہاں انہیں قیادت، نظم و ضبط اور اسلامی اقدار کے مطابق تربیت دی جاتی ہے۔تقریب کے اختتام پر ملک و ملت کی سلامتی، ترقی اور استحکام کے لیے خصوصی دعا بھی کی گئی جبکہ شرکا کے اعزاز میں افطار و ڈنر کا اہتمام کیا گیا۔
بلوچستان کو تھانوں اور چیک پوسٹوں کے بجائے قلم اور کتاب کی ضرورت ہے نوجوان قوم کا قیمتی سرمایہ ہیں، اسلامی جمعیت طلبا کی تعلیمی و اخلاقی تربیت کے لیے خدمات قابلِ تعریف ہیں، مولانا ہدایت الرحمن بلوچ
